“হাৰিভাঙ্গা” নামৰ উত্পত্তিৰ কাহিনী:
এই গাঁৱৰ নাম “হাৰিভাঙ্গা”। গাওঁখনৰ লিখিত বিৱৰণ হিচাপে কোনো তথ্য পোৱা নাযায়; কিন্তু প্ৰবাদ আৰু লোকবিশ্বাস অনুসৰি গাওঁখনৰ নামৰ উত্পভত্তি সন্দৰ্ভত দুটা কাহিনী পোৱা যায়। প্ৰথম কাহিনী অনুসৰি, দ্বাপৰ যুগত প্ৰভু শ্ৰীকৃষ্ণ আৰু মহাবীৰ জৰাসন্ধ, দুয়োৰে জন্ম হৈছিল। জৰাসন্ধ অতি অত্যাচাৰী ৰজা আছিল। জৰাসন্ধৰক জোঁৱায়েক কংসক হৰিয়ে বধ কৰিছিল। সেই হত্যাৰ পোতক তুলিবলৈ জৰাসন্ধই হৰিৰ লগত যুদ্ধ কৰে আৰু হৰিৰ লগত জৰাসন্ধৰ অষ্টাদশতম যুদ্ধখন এই ভূ-খণ্ডতে হোৱা বুলি লোকবিশ্বাস আছে। উক্ত যুদ্ধত হৰিয়ে চলনা কৰি জৰাসন্ধৰ হাতত পৰাজয়বৰণ কৰাৰ অভিনয় কৰি যুদ্ধ ভঙ্গ দি পলায়। হৰিয়ে ভঙ্গ দিয়া যুদ্ধখনৰে আঁত ধৰি ঠাইখন প্ৰথমে “হৰিভঙ্গ” নামেৰে জনাজাত আছিল আৰু পিছলৈ “হৰিভঙ্গ”ৰ অপভ্ৰংশ হৈ “হাৰিভাঙ্গা” হোৱা বুলি কোৱা হয়। পৰিৱৰ্তিত সময়ে উক্ত নামৰ কিছু সালসলনি কৰে আৰু বৰ্তমান সময়ত গাওঁখন “হাৰিভাঙ্গা”, “হাৰিভাংগা” আৰু “হাৰিভাঙা” এই তিনিওটা নামেৰে লিখিত অৱস্থাত পোৱা যায়। ইংৰাজীত HARIBHANGA আৰু নামনি অসমৰ কথিত ভাষাত “হাইৰভাঙা” বুলিও কোৱা হয়। চৰকাৰী নথি অনুসৰি বৰ্তমান গাওঁখন নাম “হাৰিভাঙ্গা” নামেৰে পঞ্জীয়নকৃত।
দ্বিতীয় কাহিনী অনুসৰি, এসময়ত মৰা পাগলাদিয়াৰ এটা সুঁতি উক্ত ভূখণ্ডৰ মাজেৰে বৈ গৈছিল। এই সুঁতিটোৰ নাম “হোকাখোৱা জান”। হোকাখোৱা জানৰ বুকুৱেদি এসময়ত বেহা-বেপাৰ কৰিবলৈ বৰপেটীয়া মুদৈ আহিছিল আৰু বিশেষকৈ গাখীৰৰ বেহা সেই সময়ত ব্যৱসায়ৰ প্ৰধান উপাদান আছিল। মুদৈয়ে “হাড়ি” (এবিধ মাটিৰ পাত্ৰ, টেকেলি)ত গাখীৰ ভৰাই নাৱঁত তুলি লৈ আহোতে প্ৰাকৃতিক দূৰ্য্যোগৰ সন্মুখীন হয় আৰু সকলোবোৰ নাওঁ দূৰ্ঘটনাপতিত হয়। ফলত গাখীৰ কঢ়িয়াই অনা হাড়িবোৰ উক্ত দূৰ্ঘটনাত ভাঙি চুড়মাৰ হৈ হোকাখোৱা জানৰ আশে পাশে সিঁচৰতি হৈ পৰে। এই ঘটনাৰ আলমলৈয়ে ওচৰ পাজৰৰ অঞ্চল সমূহৰ ৰাইজে এই ভূখণ্ডক “হাড়িভাঙা”( হাড়ি + ভাঙা) নাম দিয়ে আৰু কালক্ৰমত ই “হাৰিভাঙ্গা” নামেৰে জনাজাত হৈ পৰে।
প্ৰয়োজনীয় তথ্য:
গাওঁ: হাৰিভাঙ্গা
জিলা: নলবাৰী
মৌজা: নাম্বৰভাগ
আৰক্ষী চকী: টিহু
ডাক সূচাংক: ৭৮১৩৭৮
চাৰিসীমা:
পূৱে বালি গাওঁ, পশ্চিমে মাখিবাহা গাওঁ, উত্তৰে মথুৰাপুৰ গাওঁ, দক্ষিণে সন্ধেলী গাওঁ।
যাতায়াত:
পথ: গুৱাহাটীৰ পৰা টিহুৰ চ’কৰ মাজেৰে টিহু হৈ হাৰিভাঙ্গালৈ দূৰত্ব প্ৰায় ১০০ কিলোমিটাৰ।
গুৱাহাটীৰ পৰা নলবাৰীৰ মাজেৰে চামতা-সাহপুৰ হৈ হাৰিভাঙ্গালৈ দূৰত্ব প্ৰায় ৯০ কিলোমিটাৰ।
গুৱাহাটীৰ পৰা নলবাৰী হৈ কৈঠালকুছিৰ মাজেৰে হাৰিভাঙ্গালৈ দূৰত্ব প্ৰায় ৯০ কিলোমিটাৰ।
যাতায়াত সূচল আৰু দিনৰ প্ৰায়ভাগতেই গাড়ী-মটৰ চলাচল কৰি থাকে।
ৰেল: টিহু ৰেলষ্টেশ্যনৰ পৰা দূৰত্ব ৫ কিলোমিটাৰ।
কৈঠালকুছি ৰেলষ্টেশ্যনৰ পৰা দূৰত্ব প্ৰায় ৬ কিলোমিটাৰ।
হাৰিভাঙ্গা গাঁৱৰ সামগ্ৰিক তথ্য:
১. গাওঁখনে ভৌগলিকভাৱে ২৬০২৬.৭৫ উত্তৰ অক্ষাংশ আৰু ৯১০১৭.৫ পূৱ দ্ৰাঘিমা চুই গৈছে।
২. চৰকাৰী হিচাপত হাৰিভাঙ্গা গাঁৱৰ মাটিকালি প্ৰায ৪৭১৭ বিঘা, অৰ্থাত্ ৬৩১.৫৩ হেক্টৰ।
৩. খেতিৰ মাটি প্ৰায় ২১০২ বিঘা, বাসস্থান প্ৰায় ১১০৪ বিঘা, যাতায়ৰ বাবে মাটি প্ৰায় ১৩৭ বিঘা আৰু অন্যান্য পতিত মাটি প্ৰায় ৩৭ বিঘা।
৪. গাঁৱত বনাঞ্চল আৰু চৰণীয়া পথাৰ নাই।
৫. জনসংখ্যা প্ৰায় ৫০০০ জন; ২৫৪০ জন পুৰুষৰ বিপৰীতে ২৪৬০ গৰাকী মহিলা।
৬. পৰিয়াল সংখ্যাৰ পৰা নামবৰভাগ মৌজাৰ ৩১৮৭ পৰিয়ালৰ বিপৰীতে এই গাঁৱৰ পৰিয়ালৰ সংখ্যা ৮৪০টা, তাৰে ১৩৫টা অনুসূচীত জাতিৰ পৰিয়াল।
৭. অনুসূচীত জনজাতি নাই।
৮. চিকিত্সালয় এখন, ডাকঘৰ এটা, পশু চিকিত্সাৰ উপকেন্দ্ৰ এটা, উচ্চ মাধ্যমিক বিদ্যালয় ( বেচৰকাৰী খণ্ডৰ উচ্চতৰ মাধ্যমিক খণ্ড একেলগে ) এখন, বালিকা উচ্চ মাধ্যমিক বিদ্যালয় এখন, উচ্চ বুনিয়াদী বিদ্যালয় এখন, বহুমুখী সমবায় সমিতি, গাওঁ পঞ্চায়তৰ কাৰ্য্যালয়, গাওঁ উন্নয়ন সমিতি, অসম গ্ৰামীণ বিকাশ বেংক, দুখন সংগীত মহাবিদ্যালয়, দুখন ব্যক্তিগত খণ্ডৰ শিক্ষানুষ্ঠান, ৰাজহুৱা পুথিভঁড়াল এটা, ১৬ খন চৰকাৰী প্ৰাথমিক বিদ্যালয়, বাছ আস্থান, অটো আস্থান আৰু পৰিবাহী গাড়ীৰ আস্থান হাৰিভাঙ্গা গাঁৱত আছে।
৯. চৰকাৰী ৰাষ্টা দুটা: উত্তৰা দক্ষিণাকৈ টিহু-সাহপুৰ সংযোগী গড়্কাপ্টানী পথ আৰু পূৱা-পশ্চিমাকৈ মাখিবাহা কৈঠালকুছি সংযোগী গড়কাপ্টানী পথ।
১০. সৰ্বমুঠ চুবুৰীৰ সংখ্যা ১৮টা।
১১. নিতৌ গধূলি হাৰিভাঙ্গা চ’কত হাট বহে।